أفضل هواتف الفئة المتوسطة للتصوير |كاميرات ممتازة بسعر اقل من 3000 جنيه !

- الإعلانات -

في موبايلات كتيره بتنزل الفتره دي، والناس برده عماله تسأل عن أفضل موبايل للتصوير او أفضل كاميرا في موبايل، والنهارده في المقالة دي هنتكلم عن أفضل هواتف الفئة المتوسطة من ناحية الكاميرات في الفئة المتوسطة من اول 2500 جنية ولحد 3000 جنية والمقالة دي ليك لو انت عاوز تشتري موبايل بالسعر ده يكون بيصور كويس !

أفضل هواتف الفئة المتوسطة للتصوير

مبدأيا بس وخلي بالك كده معايا ان جودة الكاميرا وقدرتها على إنتاج صور كويسه مش بترجع للميجا بيكسل، شوفنا الفتره الأخيره موبايلات بكاميرات وصلت لـ108 ميجا بيكسل لكن لسه موصلش لأعلى Level في التصوير ، فالموضوع بيرجع لحسابات تانيه زي نوع المستشعر وفتحة العدسة وطريقة مُعالجة السوفت وير للصوره، كذا حاجه بتتحكم في جودة الصورة.


1- Redmi Note 8

الموبايل ده مقدرتش ارشحه في مقالة افضل هواتف الفئة المتوسطة عموما عشان الـNote 9 الجديد منه بيقدم مواصفات افضل طبعا ولكن الكاميرا في النوت 8 مستقرة بشكل اكبر من الاخر هتلاقي إن النوت 8 بيتميز بالكاميرات اوي غير إن الموبايل ده محترم جدًا، وهو تقريبًا الموبايل الوحيد اللي بيدعم جوجل كاميرا في الفئة دي بعد الـ Realme 5

Redmi Note 8

الموبايل ده بيجي بـ 4 كاميرات في الضهر والأساسية منهم بدقة 48 ميجا بيكسل وفتحة عدسة F/1.8 والسيلفي بيجي بدقة 13 ميجا بيكسل بفتحة عدسة F/2.0، يمكن الكاميرا الأماميه مش قد كده فيه، بس الموبايل ممتاز وبيطلع صور محترمه جدًا من الكاميرا الخلفيه، خصوصًا مع إستخدام تطبيق جوجل كاميرا.

Redmi Note 8 Camera

حرفيًا هتاخد أفضل كاميرا في الفئة السعرية دي، وغير كده كمان الـNote 8 هو افضل موبايل بيصور فيديوهات تحت الـ3000 جنيه، بيصور 4K وبيصور 1080p مع مثبت إلكتروني وجودة الفيديو بتطلع محترمه جدًا، والموبايل ده سعره حوالي 2800 جنيه مصري للنسخة الـ64 جيجا مع 4 جيجا رام ودي النسخة اللي متوفره وتقدر تجيبها بسهولة حاليًا وهي برده أفضل نسخة من حيث السعر والقيمة اللي هتقدمهالك بالسعر ده.


2- Realme 6i

الموبايل ده بيجي بكاميرا خلفيه 48 ميجا بيكسل F/1.8 والكاميرا الأماميه بدقة 16 ميجا بيكسل مع فتحة عدسة F/2.0، الكاميرا الأماميه بتاعت الـRealme 6i احسن حتى من غير جوجل كاميرا، الموبايل ده بيجي بمعالج من ميدياتك ومعالجات ميدياتك مش بتهتم بدعم المطورين برامج زي جوجل كاميرا.

 Realme 6i

سوفت وير الكاميرا بتاع ريلمي كويس مش وحش، بس للأسف مش بيديلك افضل اداء، يعني لو انت هتقارن سوفت وير ريلمي بسوفت وير شاومي لأ ريلمي هيكسب، بس موضوع Google Camera في النوت 8 هو اللي خلاني احطه في المركز الأول قبل الـ 6i.

 Realme 6i Camera

وعمومًا الموبايل ده بيدي اداء كاميرات كويس في الفئة السعرية بتاعته وكمان هيديك تجربة استخدام كلية مرضية جدا، هو اللي هرشحهولك لو مش حابب النوت 8 لأي سبب، والـ Realme 6i دلوقتي سعره حوالي 2800 جنيه للنسخة الـ64 جيجا مع 3 جيجا رام.


3- Honor 9X Lite

يمكن انت تعترض بس انا شايف ان الموبايل ده الكاميرا الخلفيه بتاعته كويسه، واللي بتيجي بدقة 48 ميجا بيكسل بفتحة عدسة F/1.8، مقارنتا بالموبايلات التانيه اللي رشحتها فا هي تقدر تبقى في المركز التالت عادي، والـNight Mode هو اقوى ميزة في الموبايل ده، ممتاز جدًا وبيطلع صور مفيش موبايل تاني بيطلعها.

Honor 9X Lite

وموبايل Honor 9X Lite مبيدعمش جوجل كاميرا، للأسف معالجات الكيرين من هواوي كلها كده تقريبًا، ويمكن السيلفي بتاع الموبايل ده ضعيف شوية لإنه بيجي بدقة 8 ميجا بيكسل بفتحة عدسة F/2.0، ميقدرش ينافس النوت 8 ولا الـ6i.

Honor 9X Lite Camera

الموبايل كلل بيقدم تجربة استخدام يمكن احسن كمان من الريلمي 6i والنوت 8 ولكن متنساش فكرة خدمات جوجل الي مش هتبقا متوفرة معاك، ده بيتوفر بنسخة بمساحة تخزين 128 جيجا مع 4 جيجا رام والمساحه الكبيره دي ميزه فيه، وبرده سعره حوالي 2800 جنيه للنسخة دي.


اعرف أكتر عن أفضل هواتف الفئة الإقتصادية 


4- Infinix Note 7

الموبايل ده بصراحه مكنتش حابب احطه، بيجي برده بنفس الكاميرا السيلفي الـ48 ميجا بيكسل، ممكن اصنفه في المركز الرابع مثلًا بعد الـ9X Lite بس مش هيقدر يتفوق على اي موبايل من الموبايلات اللي فوق دي في الكاميرا الخلفيه.

Infinix Note 7

يمكن يتفوق على الـ9X Lite مثلًا في الكاميرا الأماميه بس بفرق بسيط، يعني في السيلفي ممكن الـInfinix Note 7 يبقى رقم 3 بعد الـ6i، والموبايل ده سعره في المحلات حوالي 2850 جنيه للنسخة الـ128 جيجا مع 6 جيجا رام.


5- Redmi Note 9S

الموبايل ده فعلًا بإستخدام الجوجل كاميرا هيديك اقوى تجربة تصوير وعشان كده سبتو للاخر، حرفيا بينافس معاك لحد سعر 5500 جنيه، فعلا الـ Redmi Note 9S يستحق لقب الأفضل في فئتو حاليا، جوجل كاميرا على الموبايل ده غريبة جدًا وبتطلع نتايج مشوفتش زيها بصراحه.

Redmi Note 9S

الموبايل ده بيجي بكاميرا خلفيه بدقة 48 ميجا بيكسل بفتحة عدسة F/1.8 بمستشعر سامسونج GM2 والسيلفي بدقة 16 ميجا بيكسل بفتحة عدسة ديقة F/2.5، بس اداءها حلو جدًا خصوصًا مع إستخدام جوجل كاميرا.

Redmi Note 9S Camera

تصوير الفيديو في الموبايل ده محترم جدًا برده، الموبايل بيصور 4K وبيصور 1080p مع مثبت إلكتروني، والموبايل ده بيجي بنسختين واللي بنرشحها الـ64 جيجا مع 4 جيجا رام بسعر 3050 جنيه في المحلات دلوقتي ، والنسخة الـ128 جيجا مع 6 جيجا رام بتيجي بسعر 3550 جنيه.


كده نكون اتكلمنا عن أفضل هواتف الفئة المتوسطة من حيث الكاميرات لحد سعر 3000 جنيه تقريبا، ان شاء الله فيه كذا موضوع تاني هنتكلم فيه عن الكاميرات لحد 7000 جنيه واكتر كمان ولكن حبيت ابدأ بالفئة دي الأول لانها بتبقا فئة أغلب موبايلاتنا، متنساش تشير المقالة مع كل اصحابك لو استفدت، مع السلامة <3 .


متنساش تتابعنا على صفحة ميكسلزعشان يوصلك كل جديد عن الموبايلات والتكنولوجيا بشكل أسرع !

- الإعلانات -

قد يعجبك أيضا...
Leave A Reply

Your email address will not be published.