أفضل موبايلات الفئة المتوسطة من سعر 3000 لـ 5000 جنيه | وحوش السوق المصري !
لو بتبحث عن موبايل متوسط كويس تقدر تشتريه من سعر 3000 جنيه لحد 4500 لـ 5000 جنيه مصري، اكيد انا عارف ان الاختيارات كتير جدا عليك خصوصا في الفئة السعرية دي، عشان كده إنت موجود حاليا في الموضوع الي هيوضحلك أفضل الاختيارات في الفئة دي بدون منازع، هنقدملك زي ما متوعدين في قسم ” التوصيات ” أفضل ترشيحات لـ أفضل موبايلات الفئة المتوسطة .
عشان تبقا فاهم الصورة كويس ” الفئة المتوسطة الإقتصادية ” وهي الي بتبدا من 2500 لحد 3500 جنيه، بعد كده بتلاقي الفئة المتوسطة والي تبدأ من 3500 جنيه لحد 5000 جنيه تقريبا، بعد الـ 5000 يبقا كده بنتكلم عن فئة متوسطة عليا، وخلال الموضوع ده هنشمل 4 موبايلات في الفئة المتوسطة تحديدا، هنتكلم عن ريلمي وريدمي وهواوي وأكيد سامسونج في الفئة المتوسطة.
تابع معانا للاخر عشان تستفاد وقولنا في الكومنتات لو كنت متوقع موبايل لقيتو في الموضوع، ومتنساش تتابعنا على صفحة الفيسبوك عشان يوصلك الجديد بشكل اسرع، ويلا بينا نتعرف على أفضل موبايلات الفئة المتوسطة .
1- موبايل Realme 6
ريلمي 6 هو موبايل متوسط من ريلمي بيجي للنسخة الـ128 جيجا مع 4 جيجا رام بسعر حوالي 4100 جنية مصري، والنسخة الـ128 جيجا مع 8 جيجا رام بسعر حوالي 4700 جنية مصري، وبينفع تركب كارت ميموري وشريحتين إتصال مع بعض، هنتكلم عن ايه الي يخليك تشتري الموبايل ؟ ، كمان ايه الي يخليك متشترهوش ولو انت بتحب التفاصيل فهتلاقيني سايبلك مواصفات الموبايل الكاملة.
تشتري الريلمي 6 ليه ؟
- بيقدملك شاشة 6.5 بوصة IPS LCD بدقة FHD+،كل ده عادي، اللي مش عادي إنها بتردد 90 هيرتز بتديلك نعومة في الإستخدام والـScroll، وفكرة التردد العالي هنشوفها كتير، ده انفينكس وتكنو قرروا يتبنوا ميزة الـ90 هيرتز دي.
- بيقدملك معالج قوي في تشغيل الألعاب ميدياتيك Helio G90T، بتكنولوجيا 12 نانو، هيشغلك كل الألعاب اللي إنت عايزها وزيادة، بس لازم تتقبل فكرة إن بالسعر القليل شوية والمعالج الـ12 نانو هنا أن مع اللعب الكتير الموبايل هيسخن، وده ناتج من الأداء اللي المعالج بيطلعه.
- بيقدملك بطارية ممكن هي مش الأكبر، 4300 مللي أمبير بتدليلك 6 ساعات شاشة مفتوحة مع إستخدام متوسط ولكن معاه شاحن 30 واط بيشحن البطارية في ساعة.
- بيقدملك كاميرا خلفية 64 ميجا بيكسل بمستشعر سامسونج GW1 ممكن تكون بتلعب في الألوان شوية وبتعمل زي تجميل بسيط كده، ولكن الصور اللي بتطلع من الكاميرا عينك تحب تشوفها.
مواصفات موبايل Realme 6
- وزن الموبايل 191 جرام
- ابعاد الموبايل 162.1×74.8×8.9 مم
- تصميم الهاتف من البلاستيك البولي كاربونيت
- الهاتف يدعم تركيب شريحتين إتصال من الجيل الرابع مع كارت ميموري بحجم 256 جيجا
- شاشة من نوع IPS LCD بحجم 6.5 بوصة بدقة 1080×2400 بيكسل وبجودة FHD+ وابعاد العرض 20:9 وكثافة بيكسلات 405 بيكسل لكل بوصة والشاشة كامله تدعم معدل تحديث 90Hz والسيلفي في ثُقب
- طبقة حماية من نوع Corning Gorilla Glass 3 على الشاشة
- معالج ميدياتك Helio G90T ثماني النواة بدقة تصنيع 12 نانو ميتر وبقوة تصل الى 2.05 جيجا هيرتز والمعالج الرسومي Mali-G76 MC4
- اندرويد 10 بواجهة Realme UI 1.0
- مساحة تخزين 128 جيجا مع 4 جيجا رام او 8 جيجا رام والذاكره الصلبة من نوع UFS 2.1
- كاميرا خلفيه رُباعيه بدقة 64 ميجا بيكسل بفتحة عدسة F/1.8 وبدقة 8 ميجا بيكسل بفتحة عدسة F/2.3 للعدسة الثانيه وهي Ultra Wide للتصوير العريض، وبدقة 2 ميجا بيكسل بفتحة عدسة F/2.4 وهي ماكرو للتصوير عن قرب، وبدقة 2 ميجا بيكسل وهي Black & White
- الكاميرا الخلفيه تدعم فلاش ليد وHDR وPanorama وتصوير فيديوهات بجودة 2160p@30fps والكاميرات تدعم مُثبت إلكتروني
- كاميرا سيلفي واحده بدقة 16 ميجا بيكسل بفتحة عدسة F/2.0 تدعم HDR وPanorama وتصوير فيديوهات بجودة 1080p@30fps
- الهاتف يدعم منفذ السماعات الـ3.5 مللي
- بصمة الإصبع موجوده على زِر الباور
- الهاتف يدعم الـFace Unlock او الفتح عن طريق الوجه
- بطارية الهاتف من نوع ليثيوم بوليمر تأتي بحجم 4300 مللي امبير وتدعم الشحن السريع بقوة 30 وات عن طريق منفذ USB Type C
- الوان الهاتف الأزرق والأبيض
تعرف ايضا على مراجعة كاملة عن موبايل Realme 6
ايه الي ممكن ميعجبكش في الريلمي 6 ؟
- مفهوش مايكروفون ثانوي لعزل الضوضاء، وده بيقصر شوية على جودة تسجيل صوت الفيديوهات وجودة المكالمات في أماكن زحمه.
- الكاميرا السيلفي بالليل أدائها مش هيعجبك والصور تفاصيلها بتتمسح بشكل كبير.
- صوت Speaker الموبايل متوسط، هو مش مشكلة، بس لازم تبقى فاهم إنه مش اعلى او أفضل صوت.
- النسخة الـ4 جيجا رام من الريلمي 6 ممكن تكون متكتفه شويه والواجهة تقيله حاجة بسيطة، لو معاك فلوس وتقدر تجيب الـ8 رام هتتبسط اكتر.
2- موبايل Redmi Note 9 Pro
موبايل Redmi Note 9 Pro موبايل من شاومي في الفئة المتوسطة بيجي للنسخة الـ64 جيجا مع 6 جيجا رام بسعر 3900 جنية مصري، والنسخة الـ128 جيجا مع 6 جيجا رام بتيجي بسعر 4500 جنية، وبينفع تركب كارت ميموري وشريحتين إتصال مع بعض.
تشتري الريدمي نوت 9 برو ليه ؟
- علشان هو ممكن يكون Premium شوية، يعني ايه بريميم ؟ تصميم زجاج وشكل كاميرا خلفية مُختلف وفيه لمعة وإنعكاسات حلوة، موبايل فعلًا شكله شيك، بس وزنه وحجمه أكبر بفرق ملحوظ عن Realme 6.
- لو إنت مش حابب معالجات ميدياتك 12 نانو اللي بتسخن، فا هنا شاومي بتقدم Snapdragon 720G بتكنولوجيا 8 نانو، أدائه أقل حاجة بسيطة وسخونيته أقل وإستهلاكه للبطارية أقل.
- بيقدملك بطارية عملاقة 5000 مللي أمبير بتستحمل لحد 9 ساعات شاشة مفتوحة، وكمان معاك شاحن سريع بيشحن بقوة 30 واط بيشحن البطارية في ساعة وربع.
- فيه شوية حاجات رايقة المُستخدم بيحبها، وانت هتحبها برده زي
– الـNFC
– لمبة الإشعارات
– مايكروفون إضافي لعزل الضوضاء
– مستشعر IR للتحكم في الأجهزة الكهربائية وتلفيزون القهوة يمعلم D: - كاميرا خلفية 64 ميجا بيكسل بنفس المستشعر الـGW1، ولكن أدائها أفضل بفرق واضح وعملنا مقارنة وضحنا فيها إن النوت 9 برو هو فعلًا فتوة الكاميرات في فئته السعريه.
مواصفات موبايل Redmi Note 9 Pro
- ابعاد الموبايل 165.8×76.7×8.8 مم مع وزن 209 جرام
- الهاتف يأتي بتصميم زُجاجي من الامام والخلف مع فريم من البلاستيك
- طبقة الحماية على الضهر الزُجاجي Corning Gorilla Glass 5
- الهاتف يدعم تركيب شريحتين إتصال 4G مع كارت ميموري بحجم 256 جيجا في منفذ مخصص له
- شاشة من نوع IPS LCD بحجم 6.67 بوصة بدقة 1080×2400 بيكسل وبجودة FHD+ مع كثافة بيكسلات 395 بيكسل لكل بوصة وابعاد عرض 20:9 والشاشة كامله والسيلفي في ثُقب في منتصف الشاشة والشاشة بتردد 60 هرتز فقط
- الشاشة عليها طبقة حماية Corning Gorilla Glass 5
- معالج كوالكوم سناب دراجون 720G الجديد ثماني النواة بقوة تصل الى 2.3 جيجا هيرتز مع معمارية 8 نانو ميتر وقوة المعالج Adreno 618
- اندرويد 10 بواجهة MIUI 11
- مساحة تخزين 128 جيجا مع 6 جيجا رام او 64 جيجا مع 4 جيجا رام والذاكره من نوع UFS 2.1
- كاميرا خلفية رُباعيه بدقة 48 ميجا بيكسل بفتحة عدسة F/1.8 وبدقة 8 ميجا بيكسل بفتحة عدسة F/2.2 وهي عدسة Ultra Wide للتصوير العريض، وبدقة 5 ميجا بيكسل بفتحة عدسة F/2.4 وهي عدسة ماكرو، وبدقة 2 ميجا بيكسل بفتحة عدسة F/2.4 وهي مُخصصة للعزل
- الكاميرا الخلفية تدعم HDR وPanorama وفلاش ليد وتصوير فيديوهات بجودة تصل الى 2160p@30fps مع دعم لمثبت إلكتروني لتثبيت تصوير الفيديوهات
- كاميرا اماميه واحده بدقة 16 ميجا بيكسل بفتحة عدسة F/2.0 وهي تدعم HDR وPanorama وتصوير فيديوهات بجودة 1080p@30fps
- الهاتف يدعم منفذ السماعات الـ3.5 مللي
- بصمة الإصبع في الهاتف موجوده في الجنب على زِر الباور
- بطارية ضخمة بحجم 5020 مللي امبير تدعم الشحن السريع بقوة 18 وات عن طريق منفذ USB Type C
- الوان الهاتف الأزرق والأبيض والإسود
تعرف ايضا على مراجعة كاملة عن موبايل Redmi Note 9 Pro
ايه الي ممكن ميعجبكش في الريدمي نوت 9 برو ؟
- استقرار واجهة شاومي مش عاجبني اوي، الواجهة محتاجه شغل كتير علشان تبقى مستقره أكتر وأقدر اتطمن لها أكتر، وانا هنا بقارن واجهات ببعضها مش بعيب في الواجهة وخلاص.
- الشاشة مش 90 هيرتز ومش AMOLED، ولكن مازالت بتقدم أداء مُرضي ومحدش إشتكى منها.
- وزن الموبايل تقيل شوية وحجمه كبير شوية، لازم تبقى متقبل ده.
- بروز الكاميرات هنا كبير شوية، ويمكن يكون ده أكبر بروز شوفته في الفئة السعريه دي.
انا هنا مرشحتش الـ Redmi Note 9S لسببين، أولًا توكيل شاومي في مصر مبقاش بيجيب منه كميات تاني وإعتمادة حاليًا على Note 9 Pro، ثانيًا نوت 9 برو أحسن في الكاميرا وسرعة الشحن وفرق السعر بينهم بسيط.
3- موبايل Samsung Galaxy M31
موبايل Galaxy M31 هو موبايل متوسط من سامسونج الي ابتدت تهتم بشكل كبير بالفئة المتوسطة والإقتصادية في الفترة الأخيرة، الموبايل بييجي بحوالي 4300 جنية للنسخة 128 جيجا مع 6 جيجا رام وينفع تركب كارت ميموري وشريحتين اتصال مع بعض.
تشتري الـ Galaxy M31 ليه ؟
- بيقدم أفضل تجربة شاشة أموليد 6.4 بوصة بدقة FHD+، هي واخدة شكل النوتش مش الثقب زي ريلمي وشاومي، ولكنها بتقدم أفضل تجربة سطوع وألوان عنهم، وهتخسر ميزة الـ90 هيرتز اللي في ريلمي 6 في مقابل الشاشة الـAMOLED اللي هنا.
- بيقدم كاميرا خلفية وكاميرا سيلفي مُمتازة، مش عارف في بعض الناس مش عاجبهم الكاميرات اللي هنا، أعتقد هما مش بيقارنوا، بيصوروا ويقولوا وحش، ولكن شايف Galaxy M31 ميقلش حاجة عن النوت 9 برو في الكاميرات علشان معالجة سامسونج للألوان حلوة أوي والكاميرا الخلفية اللي هنا برده 64 ميجا بيكسل بنفس المسستشعر الـGW1.
مواصفات موبايل سامسونج جلاكسي A31
- وزن 185 جرام
- ابعاد 159.3×73.1×8.6 مم
- تصميم من البلاستيك البولي كاربونيت من الضهر والفريم
- الهاتف يدعم تركيب شريحتين إتصال 4G مع كارت ميموري بحجم 512 جيجا
- شاشة الهاتف من نوع Super AMOLED بحجم 6.4 بوصة وبدقة 1080×2400 بيكسل وبجودة FHD+ بكثافة بيكسلات 411 بيكسل لكل بوصة وابعاد العرض في الشاشة 20:9 والشاشه تأتي مع نوتش Infinity U في الأعلى
- معالج من ميدياتك وهو Helio P65 ثماني النواة يأتي بدقة تصنيع 12 نانو ميتر وقوته تصل الى 2.0 جيجا هيرتز والمعالج الرسومي هو Mali-G52 MC2
- اندرويد 10 بواجهة One UI 2.0
- مساحة تخزين 128 جيجا مع 4 جيجا رام
- كاميرا سيلفي واحده بدقة 20 ميجا بيكسل بفتحة عدسة F/2.2 تدعم تصوير فيديوهات بجودة 1080p@30fps
- كاميرا خلفيه رُباعيه، الأولى منهم تأتي بدقة 48 ميجا بيكسل بفتحة عدسة F/2.0 والثانيه بدقة 8 ميجا بيكسل بفتحة عدسة F/2.2 وهي Ultra Wide للتصوير العريض، والثالثه بدقة 5 ميجا بيكسل بفتحة عدسة F/2.4 وهي ماكرو والرابعه بدقة 5 ميجا بيكسل بفتحة عدسة F/2.4 وهي مُخصصة للعزل
- الكاميرات تدعم فلاش LED وHDR وPanorama وتصوير فيديوهات بجودة 1080p@30fps
- الهاتف يدعم بصمة الإصبع وهي موجوده اسفل الشاشة
- الهاتف يدعم منفذ السماعات الـ3.5 مللي
- الهاتف يدعم الفتح عن طريق الوجه او Face Unlock
- الهاتف يدعم خاصية NFC
- الهاتف لا يدعم لمبة الإشعارات
- بطارية الهاتف تأتي من نوع ليثيوم بوليمر بحجم 5000 مللي امبير تدعم الشحن بقوة 15 وات عن طريق منفذ USB Type C
- الوان الهاتف الإسود والأبيض والأزرق والأحمر
تعرف أيضا على مراجعة كاملة عن موبايل Samsung Galaxy M31
ايه الي ممكن ميعجبكش في الـ Galaxy M31 ؟
- الخامات البلاستيك رديئه شوية والموبايل بيتخدش من الهوا حرفيًا، والموبايل ولا بيجي معاه جراب ولا سكرينه، في إسترخاص كده من سامسونج، وكمان شكل التصميم مش حديث هو أقل موبايل من ناحية شكل التصميم في فئته السعريه من وجه نظري، لو عاوز خامات أحسن شوية وتصميم افضل شوية هات Galaxy A51.
- المعالج الـ Exynos 9611 اللي بمعمارية 10 نانو هو أقل وأضعف من المعالجات اللي قولت عليها فوق، وهو مُجملًا مقبول في الإستخدام اليومي لو إنت ميفرقش معاك إنك تحس شوية بالـ Animations وتحس شوية بتقطيع فريمات.
- غالبًا لو إنت جاي من موبايل قديم شوية مش هتحس باللي أنا بقوله ده اصلًا، إنما الأداء في الألعاب، على الورق كمواصفات كويس وبيشغل على إعدادات جرافيك عالية ولكن مفيش إستمرارية في الأداء الكويس، شوية وهتلاقي الموبايل بيسخن جامد من عند الكاميرات والموبايل إبتدأ يسقط فريمات ويهنج شوية في الألعاب بعد فترة من اللعب عليه.
- بيقدم بطارية على الورق ضخمة 6000 مللي أمبير، ولكن أدائها الفعلي مع الوقت زيها زي بطارية 4500 مثلًا من البراندات التانية، وأدائها مش بطال خالص ومش ديه مشكلتي، المشكلة الشاحن المرفق بطيء شوية 15 واط وكمان فيه شكاوي من بطأ زمن الشحن بعد فترة من الإستخدام وبتوصل لـ3 ساعات مثلا.
4- موبايل Huawei Nova 7i
النوفا 7i هو موبايل متوسط من هواوي نزل بعد مشاكلها مع جوجل، الموبايل بييجي بسعر 4500 جنية للنسخة 128 جيجا مع 8 جيجا رام وينفع تركب شريحتين اتصال او شريحة وكارت من نوع Nano مش موجود في السوق، إعتبر إنك مش معاك كارت ميمورى في الموبايل ده.
تشتري الـ Huawei Nova 7i ليه ؟
- الموبايل وزنه خفيف وتخانته رفيعه وتصميمه شيك، خامات بلاستيك بس أحسن من M31 وتقفيل محترم.
- معالج كيرن 810 تكنولوجيا 7 نانو قوي جدًا في الأداء اليومي العادي، ممكن ميكنش بيقدم أفضل تجربة العاب بس الموبايل ده حرفيًا مش بيسخن، أو السخونية بتاعته أقل من كل الموبايلات اللي قولت عليها.
- الكاميرا الخلفية والسيلفي معقولين مش الأفضل ولكن مش الأوحش، وفي توازن ما بينهم مفيش حد وحش وحد حلو الإتنين وسط، بس مش بيصور فيديوهات 4K على عكس كل المنافسين.
- بطارية معقولة مش كبيرة 4200 مللي أمبير هتكمل 6 ساعات شاشة مفتوحة بس معاك اسرع شاحن 40 واط بيجي في العلبة .
- الشاشة بتاعته IPS LCD بدقة FHD+ بتردد 60 هيرتز عادي بشكل الثقب، وهي مش شاشة مُميزة ولا هي AMOLED ولا هي 60 هيرتز ولكنها بتقدم أداء مُرضي وسطوعها أعلى حتى من شاشة النوت 9 برو.
مواصفات موبايل Huawei Nova 7i
- وزن الهاتف 183 جرام بأبعاد 159.2×76.3×8.7 مم
- تصميم الهاتف من البلاستيك البولي كاربونيت وفريم من البلاستيك
- الهاتف يدعم تركيب شريحتين إتصال 4G او شريحة واحده مع كارت ذاكره خارجي بحجم 256 جيجا
- شاشة الهاتف من نوع LTPS IPS LCD بحجم 6.4 بوصة وبدقة 1080×2310 بيكسل بجودة FHD+ مع كثافة بيكسلات 398 بيكسل لكل بوصة وابعاد عرض 19.5:9 والشاشة كامله والسيلفي في ثُقب في اعلى اليسار مثل Honor 20 و Nova 5T
- معالج هايسيليكون كيرين 810 المتوسط وهو ثُماني النواة بدقة تصنيع 7 نانو ميتر وبقوة تصل الى 2.27 جيجا هيرتز والمعالج الرسومي Mali-G52 MP6، والمعالج حقق 286 الف نقطة في اختبار انتوتو وهو يُعادل سناب دراجون 730G الموجود في Pocophone X2 الجديد
- اندرويد 10 بواجهة هواوي الجديده EMUI 10
- مساحة تخزين 128 جيجا مع 8 جيجا رام والذاكره الداخليه نوعها UFS 2.1
- كاميرا سيلفي بدقة 16 ميجا بيكسل بفتحة عدسة F/2.0 تدعم HDR وتدعم تصوير فيديوهات بجودة 1080p@30fps
- كاميرا خلفية رُباعيه بدقة 48 ميجا بيكسل بفتحة عدسة F/1.8 وبدقة 8 ميجا بيكسل بفتحة عدسة F/2.4 للعدسة الـUltra Wide، والثالثه بدقة 2 ميجا بيكسل بفتحة عدسة F/2.4 وهي ماكرو للتصوير عن قُرب، والكاميرا الرابعه 2 ميجا بيكسل بفتحة عدسة F/2.4 وهي مُخصصة للعزل
- الهاتف يدعم فلاش ليد وHDR وPanorama وتصوير فيديوهات بجودة 1080p@30fps
- الهاتف يدعم منفذ السماعات الـ3.5 مللي
- بصمة الإصبع في الهاتف موجوده على زِر الباور مثل Y9s
- بطارية الهاتف من نوع ليثيوم بوليمر بحجم 4200 مللي امبير تدعم الشحن السريع بقوة 40 وات عن طريق منفذ USB Type C
- الوان الهاتف الأخضر والأبيض والإسود
تعرف أيضا على مراجعة كاملة عن موبايل Huawei Nova 7i
ايه الي ممكن ميعجبكش في الـ Huawei Nova 7i ؟
الموبايل ده في المركز الرابع بسبب عدم دعمة لخدمات جوجل، ولو إنت مش متقبل فكرة غياب خدمات جوجل فا بلاش تفكر في الموبايل ده وإعتبره مش موجود لانك مش هتعرف تستخدمو، وعشان توصل لخدمات جوجل هتلف لفة شوية ومش هتتقبل ده لو انت مستخدم تقيل.
لو إنت عندك القابلية في إنك تشتري هواوي لإنك ليك تجارب معاها فأنصحك قبل ما تشتري تدور كويس على كل طرق التعامل مع الموبايل ده علشان تقدر تنقل الـ Data بتاعتك وتبدأ من جديد مع هواوي نوفا 7i وتعرف كل سلبيات الموضوع علشان متحسش انك مش مرتاح في يوم من الأيام.
تعرف أيضا على أفضل 5 هواتف بالفئة الإقتصادية لسنة 2020
كده نكون لمينا 4 من أفضل موبايلات الفئة المتوسطة، تقدر تختار الموبايل الي حسيتو مناسب ليك من ناحية نقطة قوة كل موبايل، هنقدم أفضل الموبايلات في الفئة المتوسطة العليا والي بتبدأ من 4500 لحد 6000 جنيه مصري قريب جدا.
لو استفدت من الموضوع اكتبلنا في الكومنتات، و اكتبلنا اسم الموبايل الي قررت تشتريه بعد ما قريت الموضوع.
متنساش تتابعنا على صفحة ميكسلز عشان يوصلك كل جديد عن الموبايلات والتكنولوجيا بشكل أسرع !
