مراجعة هاتف Xiaomi Redmi 9 الجديد | موبايل رخيص أفضل من الغالي !

اتكلمنا شوية عن موبايل شاومي الجديد الـ Xiaomi Redmi 9 ، وذكرنا أن من الغريب أن الموبايل يتم إطلاقه بمواصفات قريبة جدا من اخ الموبايل الأكبر الـ Xiaomi Redmi note 9 مع أن هناك فرق في الفئة السعرية بين الموبايلين ، وطبعا زي ما احنا شايفين من شاومي في آخر موسم هواتف انها بتنافس بشكل قوي جدا وبتعمل المعادلة الصعبة وهي ” أفضل قيمة مقابل أفضل سعر ” زي ما شوفنا في آخر سلسلة ليها سواء في سلسلة النوت او الريدمي .


مراجعة كاملة لهاتف Xiaomi Redmi 9 :-

قررنا نصبر لفترة معقولة قبل ما نعمل المراجعة عن الموبايل عشان نقدر نوصل التجربة الكاملة عن الموبايل ليكم ونكون جمعنا أغلب العيوب الي ممكن تزعجك وانت بتستخدم الموبايل وأغلب المميزات الي تخليك تفضل الموبايل ده عن غيره من المنافسين .

ذكرنا قبل كده ان غريب من شاومي انها تطلق الـ Redmi 9 بنفس مواصفات النوت 9 تقريبا ، ولكن المفاجئة كانت إن الشاومي ريدمي 9 بيميز نفسه عن أخوه النوت في حجات كتيرة جدا ! كمل المراجعة للاخر عشان تعرف ليه ” الرخيص أفضل من الغالي ” .


التصميم :-

تصميم الموبايل في البداية بيقدم خامات متوقعة في الفئة السعرية وهي البلاستيك اللامع أو مادة البوليكاربونيت والي هيمنحك تجربة ليست سيئة من ناحية الخامات ، ولكن الشيء الخادع إن شاومي بتقدم تصميم فخم وعصري لدرجة أنك لن تظن ابدا أنه تصميم هاتف اقتصادي الا عندما تلمس ظهر الهاتف وتتعرف على الخامات المستخدمة ، التصميم تقريبا نفس تصميم الـ Xiaomi Redmi note 8 لكن الإختلاف في الخامات لا أكثر .

تصميم الموبايل من الظهر بيمثل فكرة تصميم هاتف ريلمي C3 وهو إن طبقة التصميم بها تعرجات ونقشة وخرابيش وظيفتها تمنحك تجربة أفضل بالنسبة للخامات وأيضا لحماية الموبايل من التجريح ، فيه بروز خفيف لكاميرا الموبايل الخلفية ولكن بيختفي مع تركيبك للجراب المرفق في علبة الموبايل .

مواصفات تصميم هاتف Xiaomi Redmi 9

  • وزن الموبايل 198 جرام
  • ابعاد الموبايل ( 163.3x77x9.1 ) مم ودي المفروض ابعاد كويسة جدا لقبضة اليد الصغيرة
  • خامات خارجية من البلاستيك اللامع بالكامل ” البولي كاربونيت “

وزن الهاتف 198 جرام وده وزن ثقيل ولكن مقبول في الفئة السعرية الإقتصادية الي بينافس فيها الريدمي 9 وكمان فيه توزيع لوزن الموبايل بشكل ممتاز على كامل التصميم بحيث يمنحك تجربة حمل مريحة ومش هتشعر إن الموبايل تقيل في ايدك ومزعج .


الشاشة :-

الشاشة بتيجي من نوع IPS LCD بشكل النوتش القديم للاسف ولكن مش عاوزين ننسى اننا بنتكلم في فئة سعرية إقتصادية وأكيد شاومي عاوزة تسيب التصميم الأفضل للشاشة للهاتف الأغلى وهو الـ Redmi Note 9 ، مساحة الشاشة 6.53 إنش وتحتل نسبة 89.83% من الواجهة الأمامية للهاتف ، جودة الشاشة ودي من أحد المميزات القوية للهاتف FHD+ بدقة 1080×2340 بكسل .

معدل كثافة البكسلات بيوصل لـ 395 بكسل لكل إنش وده الي هيمنحك كثافة وتشبع في الألوان بشكل كبير في الشاشة ، أبعاد العرض جيدة جدا بتمثل 19.5:9 لعرض محتوى أكبر ، تدعم الشاشة طبقة الحماية Corning Gorilla Glass الجيل الثالث ده غير ان فيه طبقة حماية بلاستيكية مرفقة على الشاشة لحماية أكبر .

خواص شاشة شاومي ريدمي 9

تدعم الشاشة أكثر من خاصية عرض لوضع اللرؤية حيث تدعم :

  • وضع الـ Reading mode 2.0 وده بيخلي أي خط على الشاشة حاد أكتر ويديك تجربة مريحة في القراءة
  • وضع الـ Sunlight mode وده بتستخدمو وانت خارج في الشمس بحيث أنو بيديك أكبر شدة سطوع تقدر تحصل عليها
  • وضع حماية العين الـ Eye protection وده غني عن التعريف وموجود في موبايلات كتيرة جدا وباختصار هو وضع بتشغلوا وانت في مكان دون أي إضاءة وبتستخدم الموبايل فبيمنحك سطوع مريح .
إقرأ أيضاً  كل ما تحتاج معرفته عن مواصفات Oppo Find X7!

تجربة الهاتف الفعلية من نقطة الشاشة ممتازة لحد كبير ومع المقارنة بأحد المنافسين كمثال Realme C3 فالريدمي 9 يتفوق بجدارة من حيث دقة الشاشة الـ FHD+ وكثافة البكسلات والألوان المتشبعة ولكن يتفوق الريلمي C3 بنقطة ” سطوع الشاشة ” ، شاشة الريدمي 9 هي الأفضل في الفئة من حيث الجودة والدقة ولكن في السطوع فنقول ان الريدمي 9 يحتل المركز الثاني بعد الـ Realme C3 ولا أعتقد ان هذه النقطة تقلل من شأن الريدمي 9 .


العتاد والأداء :-

الموبايل يأتي بمعالج من شركة ميدياتيك من نوع Helio G80 بتكنولوجيا 12 نانو مع معالج رسومي من نوع Mali-G52 MC2 وزي ما قولنا قبل كده المعالج ده هو نفس معالج Realme 6i وده معناه إنك هتاخد تجربو ممتازة وسلسة جدا في الإستخدام اليومي الشاق أو التنقل بين التطبيقات بل وإن بوجود سوفتوير شاومي الخفيف جدا والمستقر خصوصا في الـ Redmi 9 فحضرتك بتاخد تجربة أفضل كمان من الريلمي 6i وكده شاومي بتحقق معادلة جديدة وهي ” الأرخص الأفضل ” .


إختبارات الأداء :-

طبقا لموقع وتطبيق Antutu Benchmark الشهير والـ بيقيس الأداء بدقة الـ Xiaomi Redmi 9 حقق 199951 في إختبار الأداء ، وبكده يكون متفوق وبشكل كبير على منافسو الأغلى منو الريلمي C3 الي محقق رقم 179468 وشاومي حاليا متربعة على عرش العتاد والأداء في الفئة السعرية الأقل من 2500 جنيه .

مواصفات عتاد هاتف شاومي ريدمي 9

  • معالج ميدياتك Helio G80 ثماني النواة بدقة تصنيع 12 نانومتر والنواتين الأقوى Cortex A75 بتردد يصل إلى 2.0 جيجاهرتز
  • المعالج الرسومي هو Mali-G52 MC2
  • النسخة الأولى من الهاتف تأتي بذاكرة صلبة من نوع eMMC 5.1 بسعة 32 جيجا بايت مع ذاكرة عشوائية من نوع LPDDR4X بسعة 3 جيجا بايت .
  • النسخة الثانية من الهاتف تأتي بذاكرة صلبة من نوع eMMC 5.1 بسعة 64 جيجا بايت مع ذاكرة عشوائية من نوع LPDDR4X بسعة 4 جيجا بايت .
  • نظام تشغيل اندرويد 10.0 مع واجهة شاومي الممتازة Miui 12

بعيدا عن الأرقام وفي الاستخدام الواقعي فالريدمي 9 بيقدم تجربة ممتازة في الفئة السعرية دي و متوقعتش يكون ممتاز الأداء الرسومي في نقطة الالعاب زي PUPG Mobile الي قدر يشغلها بجرافيك HD مع 40 فريم في الثانية ، و جربنا كمان لعبة Call Of Duty والموبايل حقق أداء متوسط مع جرافيك Medium وكان فيه سخونة من المعالج بعد فترة متوسطة من التجربة .

لكن إحذر تفكر تجيب الموبايل عشان تلعب لعبة زي Fortnite لأنك بعد 7 جيجا تحميل هتلاقي إن اللعبة اشتغلت على 15 فريم وهتلاقي تجربة غير ممتعة بالمرة ، فنقدر نقول إن الموبايل ممتاز في الأداء الرسومي من الألعاب المتوسطة وكمان المهام المتعددة بين تطبيقات السوشيال ميديا العادية مع تجربة ممتازة مع واجهة شاومي Miui 12 .

إقرأ أيضاً  مراجعة هاتف Realme C3 هاتف مع امكانيات خرافية بسعر غير متوقع !

الكاميرا الخلفية :-

شاومي حاولت على قد ما تقدر تتميز في كل حاجه ولكن أكيد الموبايل مش هيبقى كامل وأكيد فيه حاجه مش هو الأفضل فيها وهنا إحنا بنتكلم على الكاميرات ، تجربة الكاميرات في الريدمي 9 مش زي على الورق تماما ولكن خلونا الأول نعرف مواصفات الكاميرا الخلفية بالتفصيل بعدين نشوف أمثلة وعينات للتصوير .

الكاميرات الخلفية بالتفصيل

الكاميرا الخلفية تأتي بكاميرا رباعية مع فلاش أحادي والكاميرات الرباعية كالاتي :

  • الكاميرا الأولى بدقة 13 ميجا بكسل بفتحة عدسة F/2.2 وهي الكاميرا الأساسية
  • الكاميرا الثانية تأتي بدقة 8 ميجابكسل بفتحة عدسة F/2.2 وهي الكاميرا الخاصة بالتصوير العريض الـ ultra wide والكاميرا الثالثة تأتي بدقة 5 ميجا بكسل بفتحة عدسة F/2.4 وهي الخاصة بالتصوير الماكرو
  • والكاميرا الرابعة تأتي بدقة 2 ميجا بكسل بفتحة عدسة F/2.4 وهي الخاصة بعمل العزل والبورتريه

تصوير الفيديو : يدعم الهاتف تصوير الفيديوهات بجودة الـ FHD بدقة 1080 بكسل بمعدل التقاط 30 إطار في الثانية والتصوير بجودة الـ HD بدقة 720 بكسل بمعدل التقاط 30 إطار في الثانية .


الكاميرا الأمامية ( السيلفي ) :-

الكاميرا الأمامية بتيجي بدقة 8 ميجا بكسل بفتحة عدسة F/2.0 وبتدعم العزل و الـHDR وبصراحة ادائها كويس جدا على عكس الكاميرا الخلفية بل وتتفوق كمان على الريلمي سي 3 من حيث دقة الألوان مثل لون الجلد الطبيعي وتوزيع الإضاءة والتباين .


الصوت والشبكات :-

جودة صوت الريدمي 9 هو حرفيا طفرة في هواتف الفئة الإقتصادية حيث أن الصوت نقي جدا وعالي وهتحصل على تجربة مرضية في تجربة المشاهدة او تجربة اللعب ، الموبايل بيدعم الميكروفون الثانوي الخاص بعزل الضوضاء والضجيج أثناء استخدام الهاتف بصفة عامة ، و يدعم منفذ الـ 3.5 ملم الخاص بسماعات الاذن .

طبعا كلنا واجهنا مشاكل قبل كده مع قوة شبكات شاومي في الوايفاي وخصوصا شبكات المحمول ولكن انا جربت الموبايل في اكتر من مكان وعادة كانت الشبكه فيها مش كويسة ولكن فيه تحسن ملحوظ جدا خصوصا في شبكات الوايفاي و معتقدش تواجهك أي مشكلة في نقطة الشبكات في الريدمي 9 .


البطارية :-

البطارية بتيجي بسعة 5020 مللي أمبير مع شحن سريع بقوة 18 واط ، والموبايل يدعم الشحن السريع 18 وات وطبعا يبقى منفذ الشحن Type-C ، للاسف الشاحن الي مع الموبايل في العلبة 10 وات فقط ولكن تقدر تشتري شاحن سريع و هتقدر تحصل على سرعة الشحن الكاملة 18 وات .

البطارية كانت بتقعد معايا يومين مع استخدام متوسط للموبايل ، وقدرت تستحمل يوم كامل مع الإستخدام المكثف والألعاب وبتشحن الموبايل في نهاية اليوم ، يعني معتقدش هتحتاج تشتري شاحن سريع اًصلا لأن عمر البطارية كويس جدا ولو استخدامك مفهوش جيمنج البطارية ممكن توصل معاك يومين او يوم ونص مستريح جدا .

إقرأ أيضاً  مراجعة هاتف Samsung Galaxy S20 Plus مع أبرز المميزات والعيوب

مميزات Xiaomi Redmi 9 :-

  • يدعم مستشعر البصمة مع أداء سريع جدا
  • منفذ USB من النوع الأحدث الـ Type C
  • تصميم عصري وفريد مع ظهر مضاد للتبصيم
  • يدعم الميكروفون الثانوي بعكس الـ Realme C3 
  • شاشة FHD+ مع طبقة حماية نادراً ما نجدها في الفئة الاقتصادية
  • أداء قوي بسعر رخيص أحد ما يميز سلسلة الـ Redmi من شاومي
  • يدعم الانفرا ريد الخاص بالتحكم في الأجهزة الكهربائية من خلال الهاتف
  • يدعم الشحن السريع بقوة 18 واط لتتمكن من شحن الهاتف خلال وقت قصير
  • صوت الموبايل عالي ومجسم ومن أفضل الموبايلات من ناحية الصوت في فئته السعرية
  • بطارية كبيرة يمكنها العمل لفترة طويلة خلال اليوم بأكمله دون الحاجة إلى الشحن بصورة متكررة

عيوب موبايل Xiaomi Redmi 9 :-

  • الشاحن المرفق مع علبة الموبايل 10 واط في حين انو بيدعم للشحن بقوة 18 واط
  • انخفاض جودة الكاميرا الخلفية وتفوق المنافسين عليها مثل كاميرا الريلمي C3
  • انخفاض السطوع بشكل كبير تحت أشعة الشمس
  • سخونة ملحوظة من المعالج من الإستخدام المكثف في اللعب

الرأي النهائي تشتريه ولا لا ؟

خلونا نتفق إن الموبايل قوي جدا في الفئة السعرية الي هو فيها انت بتاخد أفضل عتاد واداء موجود وأحسن شاشة وكمان بطارية عملاقة وشحن سريع أو شحن معقول جدا لو مش هتشتري شاحن سريع ولكن انصحك وبشدة تشتري النسخة الـ 64 جيجا مساحة تخزينية و 4 جيجا رام عشان تاخد التجربة المرضية جدا في الإستخدام سواء الإستخدام المكثف أو الألعاب ، ” موبايل رخيص ومنافس للغالي ” وده أكتر وصف ممكن نوصف بيه الريدمي 9 .


فتح صندوق الشاومي ريدمي 9

  • هاتف شاومي ريدمي 9
  • كتاب الارشادات والضمان
  • ظهرية للهاتف ( جراب )
  • شاحن بقوة 10 وات
  • وصلة Type-c

ألوان الموبايل المتوفرة

  • الرمادي
  • البنفسجي
  • وباللون الأخضر

أسعار الـ Xiaomi Redmi 9

السعر العالمي للـ Xiaomi Redmi 9 بالنسبة للنسخة الـ 32 جيجا تخزين مع 3 رام هو $120 ، وبالنسبة للنسخة الـ 64/4 جيجا تأتي بسعر $139 ولكن بالطبع السعر يكون في الدول العربية ومصر اغلى قليلا من السعر العالمي .


الدولةالنسخة – السعر
سعر هاتف Xiaomi Redmi 9 في مصر32/3 – 2230 جنيه مصري ، 64/6 – 2500 جنيه
سعر هاتف Xiaomi Redmi 9 في السعودية32/3 – 450 ريال سعودي ، 64/6 – 525 ريال
سعر هاتف Xiaomi Redmi 9 في الإمارات32/3 – 440 درهم إماراتي ، 64/6 – 520 درهم
سعر هاتف Xiaomi Redmi 9 في الكويت32/3 – 32 دينار كويتي ، 64/6 – 41 دينار كويتي
سعر هاتف Xiaomi Redmi 9 في البحرين32/3 – 41 دينار بحريني ، 64/6 – 52 دينار
سعر هاتف Xiaomi Redmi 9 في فلسطين32/3 – 395 شيكل فلسطيني ، 64/6 – 470 شيكل
سعر هاتف Xiaomi Redmi 9 في الأردن32/3 – 70 دينار أردني ، 64/6 – 90 دينار
سعر هاتف Xiaomi Redmi 9 في عمان32/3 – 38.8 ريال عماني ، 64/6 – 54 ريال عماني
سعر هاتف Xiaomi Redmi 9 في المغرب32/3 – 980 درهم مغربي ، 64/6 – 1300 درهم
برجاء العلم أن الأسعار قد لا تكون 100% صحيحة

فيديو الإعلان عن هاتف شاومي ريدمي 9

//www.youtube.com/watch?v=xKADYHiXbAw

لو عجبتك المراجعة اعملها شير وعرف اصحابك عليها و قولنا في الكومنتات لو المراجعة جاوبت علي اسئلتك ولا لا

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق